大耗星 (二)

最近睇中兩件野，都不約而同地被人截足先登，一個相機用充電器，上星期問賣家都仲有，過兩日個賣家就話賣左，佢post左兩個月都無賣到，但就o係我發現 之後無耐而賣出，只歎自己唔好彩，因為呢個充電器真係好抵，賣100蚊，另外一個人賣500，我有d 懷疑係賣500 的人向賣100的人入貨，以免流失準買家。另一個係部雙鏡機，登左大約十日，一直無人要，我pm賣家話有興趣，之後打電話畀佢但唔通，點知隔兩日又話賣左......算，慳返d 錢。

睇得多易手網，有時會發現一d 真係好抵的二手相機，價錢低於佢ke價值，不能不心動，但自己根本無咁多錢，事實上亦唔係真有需要，往往只好等其他有心人接收；有時則是見到筍野但唔夠人快，唯有歎走寶。

如果我識在股海中尋寶就好，假使你相信股票價值最終會反映在股價上，則你只須找尋被低估的股票然後入貨，等升。但相機唔同，好似而家數碼機當道，好多舊時的菲林機都大幅降價，我見過一部二手保養不錯的Nikon F4可以不足3000成交，跟二手的D70s 差不多價錢，但論料論機能，F4好過D70s 好多；另一方面，有D被吹噓的鏡頭又不合理地貴，莫明其妙。

三月差不多過去，粗略結算一下，今個月內花了約二千買書及CD，另外還有一些攝影器材，以及最新入手的Wii，「果然」是大耗星作祟啊！

大耗星

三月開始，買多左好多野，適逢書店減價，差不多每次入去都有收獲；另外又買多左CD，半個月內買左最少六隻。最近又再度迷上相機的易手版/Yahoo 拍賣，日日花時間尋寶，見到筍野又會心思思... 偶然諗起蘇民峰的豬年運程，話蛇仔蛇女今年犯太歲，又有大耗星，主破財，佢話就算你想減少消費、積極儲錢，個天都會有辦法令你破財：例如大病一場；最好的化解方法係應左佢，可以買Ｄ保值野、投資藍籌股等等... 我一邊打呢段批語，一邊可以回憶/想像到蘇民峰嘅語氣同表情。
其實我買書買CD都係為左應劫啫，總好過大病一場，係咪？我對自己說...

P.S. 聽說如預測有血光之災可以捐血以代，是耶非耶？

電腦疑難雜解 #1

身邊朋友經常遇到不少電腦疑難，大多跟病毒/malware有關，有D malware相當厲害，點剷都剷唔走，就算最後剷走左，用software scan多兩次都無發現，都總係覺得餘孽未除。呢個情況下，我通當會建議重裝OS，呢個係最徹底有效的方法。好多人只有o係無可奈何的情況下先會重裝OS，但其實應該習慣每一年至年半重裝一次，因為電腦(尤其是Windows)用得一年半載，software裝完又卸，好多時會積存左一D 垃圾，例如一D 無用的Registry key，一些莫明其妙的temp files, DLL等等，積得多就會減低電腦的效能，有時甚至會出現D 小毛病，例如某D FILE開唔到、又開得好慢，有時甚至突然眼前一黑，電腦自動REBOOT，不一而足。

(兩個月前的舊文, 一直都係draft, 而家寫多幾段)

雖然我自己做唔到，但我心中認為最佳的practice是將system OS 同其他files 分開兩個harddisk (不只是分partition)，一來個system harddisk 死左都易d處理，二來要重裝時亦輕鬆得多，唔使太刻意backup。

最近GOOGLE做調查，話有約十分一網頁內有惡意程式，問題其實一直存在，連Microsoft自己都出左個Windows Defender來對付惡意程式就知，但一般大眾根本搞唔清惡意程式同以往講的電腦病毒的分別，賴野時都以「中毒」統稱。

我諗一個最主要的分別係絕大部份(我唔敢講全部)惡意程式係唔會自我傳播，中招的原因大多是用戶於網上下載一些來歷不明的免費軟件，或輕易讓一些網頁執行一些Active X script。一般用戶好難分辨邊d 網頁有問題，所以google 而家就例明懷疑有問題的網頁。用戶可以做的就係安裝一些Anti-Spyware/Malware 的軟件，原理同防毒軟件一樣，而時有部份主流的防毒軟件都有防止惡意程式的功能。裝左都唔係可以一勞永逸，最重要係定期scan 下部電腦，最好一星期scan 一次，等d 軟件剷走tracking cookie都好。

電腦當然帶來好多方便，但用得唔好只會帶來更多的麻煩。尤以用Windows為甚，所以我呢幾年聽到有人話要買新電腦都會慫踴佢地買Mac 機，因為Mac機真係可以用得輕鬆好多。

15% off

各大書局開始春季大減價，唔知由幾時開始，逢減價都要表明係「大減價」，有時仲要加埋瘋狂二字以示減幅驚人，最經典的莫過於「先施瘋狂大減價」。今日經過三聯，見到有橫額寫住「八五折起」下有英文字 "up to 15% off"。略懂中英文的都知道這兩句意思不同，中文句子表示店內圖書最少有八五折優惠，有些可能七折甚至六折；而英文句子則指店內圖書最多只有八五折優惠。這種錯誤出於強調「知識就是力量」的書店實在有點那個。

很久沒有寫Blog，離上次寫秋季大減價已四個月，期間只寫了兩個entries。上次提到本Oxford Collocations Dictionary for Students of English，最近我甚至見到有大陸的授權影印版，只售七十多人民幣，除了紙質及印刷較差之外，內容完全相同，實在物超所值，我就只有徒歎奈何。