GT Force Pro

又係打機，最近向朋友的朋友買左個GT Force Pro 連GT4 game. 日日唔係玩winning 就係GT4，一諗起7月中出機戰ALPHA第3集同8月出太鼓就知自己有排唔得閒。



講番個軚盤，手感真係唔錯，夠重，油門等腳踏的反應好快同敏感，搶軚感覺好強烈(至於似唔似真我就唔知，因為我唔識開 車，亦未試過開真車) 如果玩D 多彎又急的賽道，轉彎後一定要好用力捉實堂軚，令架車保持直線行駛，否則好易失控，一失控就真係失去控制，成堂軚鬆晒，如果唔煞車的話無咩可能可以救得 番，同用KEYPAD玩好唔同。震動亦係好強烈，好似係富士賽車場，有一個減速彎可以抄小路直衝過去，但就要經過一段石仔路，一上條石仔路，個軚就會好 震，又係一定要捉實，因為係會震到(可能有一部份係因為搶軚)個軚會自己向左/右。我試過玩一個錦標賽，連續五場，每場平均五、六個圈，玩到第五場時隻手 已經好攰，有D 酸軟，所以唔可以玩好耐。另外雖然我好少用波棍，但試過個波棍的反應都好快，方便過用軚盤下面的L1/R1轉波。

但總結一句，呢個軚盤賣1200實在太貴，我覺得賣600-700 先合理，同埋如果唔係長放出來，而係好似我咁玩先拿出來的話就好煩，好多線，一來要火牛、又要插usb，腳踏又有條線駁去軚盤。所以每次玩之前都要用4、5分鐘setup，間接令我玩少左。

Hori Anasin2Turbo

最近掛住打機，好少行街，為左玩個四年前出的FF X，買左個連射手掣，買o個時諗，既然買得就買個無線。點知買左先知錯，因為佢係無線，有省電功能，3分鐘收唔到新指令就會關，但我打算要佢連續半個鐘，唔使我理，結果都係要我睇住，失左原意。


http://www.hori.jp/products/ps2/controller/wl_as2_tb/index.html

不過，個無線手掣本身幾好，無線傳送完全無問題，無延遲的感覺，同有線一樣，Logitech都有出一款同規格的無線手掣，但就無連射，又貴D。

呢 個手掣的最大問題唔係傳送，而係D 掣做得唔到，按下去唔夠順，右邊四個掣有時按下後會有少少"CLICK"住， 唔知係唔係因為係大陸造的關係....... 左邊的十字掣亦唔係SHARP，即有時係按下掣，但就變成係「左」(一半原因係我按得唔好，但你投入打機時唔會有時間留意手指按得好唔好......)， 原裝PS2 手掣好少呢類問題(不過我個原裝手掣的左邊analogue掣都有d 問題......made in China........)。

我無試過logitech 款手掣，唔知造工會唔會好d，我亦唔知係唔係只係我唔好彩買左個差手掣，我認為hori可以做好d，起碼D掣做好D已經足夠。

最後要講下佢D掣的編排，如果你睇到張相就會發現佢個START 同 SELECT 上面同下面都有o野頂住，好難按，如果要經常reset (如機戰) 就會好辛苦。另外，hori 話一個接收器可以同時控制8個手掣，但我從無見過有單獨的手掣賣........